ముఖంలో కనిపించే ఈ లక్షణాలా? ఫ్యాటీ లివర్ హెచ్చరిక కావొచ్చు

ఫ్యాటీ లివర్ (Fatty Liver Disease) సమస్య ప్రస్తుతం వేగంగా పెరుగుతోంది. ఒకప్పుడు మద్యం సేవించే వారిలో ఎక్కువగా కనిపించిన ఈ సమస్య.. ఇప్పుడు మద్యం తాగని వారిలోనూ నాన్-ఆల్కహాలిక్ ఫ్యాటీ లివర్ (Non-Alcoholic Fatty Liver Disease - NAFLD) రూపంలో అధికంగా నమోదవుతోంది. కాలేయంలో (Liver) కొవ్వు పేరుకుపోవడమే ఈ వ్యాధికి కారణం. ప్రారంభ దశలో లక్షణాలు కనిపించకపోవడంతో దీనిని సైలెంట్ డిసీజ్ (Silent Disease) అని కూడా పిలుస్తారు.

అయితే వ్యాధి తీవ్రత పెరిగే కొద్దీ కొన్ని మార్పులు ముఖం, చర్మంపై కనిపించవచ్చని వైద్యులు (Doctors) చెబుతున్నారు. ముఖ్యంగా ముఖం ఉబ్బినట్లు కనిపించడం, కళ్ల చుట్టూ వాపు, చర్మం కాంతిహీనంగా మారడం, కళ్ల కింద నల్లటి వలయాలు, ముఖంపై నల్లటి మచ్చలు, చర్మం పొడిబారడం, దురద వంటి లక్షణాలు కనిపించే అవకాశం ఉంది. తీవ్రమైన దశలో కామెర్లు (Jaundice) రావడం, కళ్లూ-చర్మం పసుపు రంగులోకి మారడం కూడా గమనించవచ్చు.

అంతేకాదు, ఇన్సులిన్ నిరోధకత (Insulin Resistance) ఉన్నవారిలో మెడ, ముఖం చుట్టూ చర్మం నల్లబడే అవకాశం ఎక్కువగా ఉంటుంది. అయితే ఈ లక్షణాలు కనిపించాయంటే తప్పనిసరిగా ఫ్యాటీ లివర్ ఉన్నట్టే అని భావించకూడదని వైద్యులు సూచిస్తున్నారు. లివర్ ఫంక్షన్ టెస్ట్ (Liver Function Test - LFT), లివర్ స్కాన్ (Liver Scan) వంటి పరీక్షల ద్వారా మాత్రమే వ్యాధిని నిర్ధారించాలి.

ఫ్యాటీ లివర్‌ను నిర్లక్ష్యం చేస్తే కాలేయ వాపు (Liver Inflammation), సిరోసిస్ (Cirrhosis) వంటి తీవ్రమైన సమస్యలకు దారితీయొచ్చు. కాబట్టి కుడి వైపు పొత్తికడుపు నొప్పి, తీవ్రమైన అలసట, ఆకలి తగ్గడం, వికారం, ముదురు రంగు మూత్రం, పాలిపోయిన మలం వంటి లక్షణాలు కనిపిస్తే వెంటనే వైద్యులను సంప్రదించాలి.

ఈ సమస్య నుంచి దూరంగా ఉండాలంటే జంక్ ఫుడ్ (Junk Food), అధిక చక్కెర, వేయించిన ఆహారాలకు దూరంగా ఉండాలి. పీచు పదార్థాలు (Fiber), ఆకుకూరలు, పండ్లు ఎక్కువగా తీసుకోవడంతో పాటు వారానికి కనీసం 150 నిమిషాలు వ్యాయామం (Exercise) చేయాలి. అలాగే మధుమేహం (Diabetes), ఊబకాయం (Obesity) ఉన్నవారు ఏడాదికి ఒకసారి LFT లేదా లివర్ స్కాన్ (Liver Scan) చేయించుకోవడం మంచిదని నిపుణులు సూచిస్తున్నారు.