మెగా డీఎస్సీపై బాబు ఫైర్‌.. వైకాపాకు సూటి ఛాలెంజ్‌

మెగా డీఎస్సీ నియామక ప్రక్రియపై వైకాపా చేస్తున్న ఆరోపణలకు ఏపీ సీఎం చంద్రబాబు నాయుడు ఘాటుగా స్పందించారు. డీఎస్సీకి సంబంధించిన ప్రతి అంశాన్ని పారదర్శకంగా ప్రజల ముందుంచామని స్పష్టం చేశారు. అనుమానాలుంటే శాసనసభకు వచ్చి ప్రశ్నించాలని వైకాపా ఎమ్మెల్యేలకు సవాల్‌ విసిరారు.

సభలోనే సమాధానం చెబుతాం
మెగా డీఎస్సీకి సంబంధించిన ఆన్సర్‌ కీ, మెరిట్‌ లిస్ట్‌, సెలక్షన్‌ లిస్ట్‌ అన్నింటినీ ప్రజలకు అందుబాటులో ఉంచామని చంద్రబాబు తెలిపారు. ప్రభుత్వంపై ఆరోపణలు చేస్తున్నవారు ధైర్యముంటే శాసనసభకు వచ్చి చర్చించాలని అన్నారు. శాసనసభ ప్రజలకు సమాధానం చెప్పే పవిత్రమైన వేదిక అని.. అక్కడ అడిగే ప్రతి ప్రశ్నకు ప్రభుత్వం సమాధానం ఇస్తుందని స్పష్టం చేశారు.

విద్యకు టీడీపీ ప్రాధాన్యం
విద్యా రంగాన్ని టీడీపీ ఎప్పుడూ నిర్లక్ష్యం చేయలేదని చంద్రబాబు అన్నారు. గురుకుల పాఠశాలల విధానాన్ని ఎన్టీఆర్‌ తీసుకొచ్చారని గుర్తుచేశారు. ఉమ్మడి రాష్ట్రంలో పాఠశాలలతో పాటు మండలానికి ఒక కళాశాల, డివిజన్‌కు ఒక ఇంజినీరింగ్‌ కళాశాల, జిల్లాకు ఒక వైద్య కళాశాల ఏర్పాటు చేసే విధానాన్ని తీసుకొచ్చామని చెప్పారు.

14 డీఎస్సీల్లో 11 నా హయాంలోనే..
1995 నుంచి 2025 వరకు జరిగిన 14 డీఎస్సీల్లో 11 తన హయాంలోనే నిర్వహించామని చంద్రబాబు పేర్కొన్నారు. ప్రస్తుతం పాఠశాలల్లో పనిచేస్తున్న ఉపాధ్యాయుల్లో దాదాపు 80 శాతం మంది తన హయాంలో నిర్వహించిన డీఎస్సీల ద్వారా ఎంపికైనవారేనని తెలిపారు. తాను నిర్వహించిన డీఎస్సీలపై అవినీతి ఆరోపణలు వచ్చిన సందర్భం లేదని అన్నారు.

‘హిట్‌ అండ్‌ రన్‌ పార్టీ’
డీఎస్సీ వ్యవహారంపై వైకాపా చేస్తున్న ఆరోపణలను చంద్రబాబు తీవ్రంగా తప్పుబట్టారు. వైకాపా ‘హిట్‌ అండ్‌ రన్‌ పార్టీ’లా వ్యవహరిస్తోందని విమర్శించారు. ఎన్డీయే ప్రభుత్వ విశ్వసనీయతను దెబ్బతీసేందుకు చేసే ప్రయత్నాలను సహించబోమని హెచ్చరించారు. డీఎస్సీ ద్వారా ఉద్యోగాలు పొందిన ఉపాధ్యాయులు ధైర్యంగా ఉండాలని సూచించారు.

ప్రభుత్వంపై కుట్రలు చేసే వారిని ఎదుర్కొనే శక్తి తమకు ఉందని చంద్రబాబు స్పష్టం చేశారు. తాను ముఖ్యమంత్రి పదవిలో ఉన్నంత వరకు తప్పు చేసే వారిపై కఠిన చర్యలు ఉంటాయని హెచ్చరించారు.