రివ్యూ: ‘ఇరుముడి’.. రవితేజ ఖాతాలో మరో హిట్‌ పడినట్టేనా?

మాస్‌ మహారాజా రవితేజ.. మాస్‌ సినిమాలకు పెట్టింది పేరు. అయితే చాలా కాలంగా ఆయనను ఓ సహజమైన, కథకు తగ్గ పాత్రలో చూసే అవకాశం ప్రేక్షకులకు పెద్దగా రాలేదు. కమర్షియల్‌ హంగామాకు భిన్నంగా.. ఓ బలమైన కథ, తండ్రీకూతుళ్ల అనుబంధం, థ్రిల్లింగ్‌ అంశాలతో శివ నిర్వాణ తెరకెక్కించిన ‘ఇరుముడి’తో రవితేజ ప్రేక్షకుల ముందుకొచ్చారు. మరి ఈ సినిమా ఎలా ఉంది? రవితేజకు కొత్త ఇమేజ్‌ తెచ్చేలా ఉందా?

కథేంటి?
సీలేరు సమీపంలోని పొల్లూరు గ్రామంలో అరటి రైతుగా జీవించే త్రినాథ్‌ (రవితేజ).. అయ్యప్పస్వామికి పరమ భక్తుడు. మద్యానికి బానిసైనప్పటికీ.. ఏటా అయ్యప్ప మాల ధరించి నిష్టగా దీక్ష చేస్తుంటాడు. తన ప్రాణమైన కూతురు మణికంఠ (బేబీ నక్షత్ర) అంటే అతడికి ఎంతో ప్రేమ. కూతురిని భయపడకుండా ధైర్యంగా పెంచే త్రినాథ్‌.. తనకు ఏం జరిగినా వచ్చి చెప్పాలని చెబుతుంటాడు. తండ్రి మాటలను పాటించే మణికంఠ.. తాను చదువుకుంటున్న పాఠశాలలో జరుగుతున్న ఓ కీలక విషయాన్ని గుర్తిస్తుంది. దాన్ని తండ్రికి చెప్పాలని ప్రయత్నించేలోపే అనూహ్య పరిణామాలు చోటుచేసుకుంటాయి.

అసలు మణికంఠ తెలుసుకున్న విషయం ఏంటి? గ్రామంలో, పాఠశాలలో ఏం జరుగుతోంది? త్రినాథ్‌కు ఆ విషయం ఎప్పుడు తెలుస్తుంది? ఆ తర్వాత ఏం జరిగింది? అన్నదే ‘ఇరుముడి’ కథ.

ఎలా ఉందంటే..
తండ్రీకూతుళ్ల బంధాన్ని ప్రధానంగా తీసుకున్నప్పటికీ.. ‘ఇరుముడి’ అక్కడితో ఆగిపోదు. క్రైమ్‌ బ్యాక్‌డ్రాప్‌, థ్రిల్లింగ్‌ అంశాలు, సామాజిక సందేశాన్ని కలిపి కథను నడిపించారు.

అయ్యప్ప మాల, భక్తి నేపథ్యం సినిమాకు ప్రత్యేకతను తీసుకొచ్చింది. ముఖ్యంగా త్రినాథ్‌ పాత్ర మాల ధరించిన తర్వాత కథలో వచ్చే మార్పులు ఆసక్తిని పెంచుతాయి. తండ్రి–కూతుళ్ల మధ్య సన్నివేశాలు భావోద్వేగాలను పండిస్తాయి.

గ్రామం చుట్టూ తిరిగే అనుమానాస్పద పరిణామాలు, అమ్మాయిల మరణాలు, స్కూల్‌లో జరుగుతున్న ఘటనలు కథలో ఉత్కంఠను పెంచుతాయి. అయితే ఇంతటి సీరియస్‌ పరిణామాలు జరుగుతున్న సమయంలో పోలీసుల పాత్ర పెద్దగా కనిపించకపోవడం కాస్త సినిమాటిక్‌గా అనిపిస్తుంది.

అయితే ద్వితీయార్ధంలో వచ్చే మలుపులు, క్లైమాక్స్‌ సన్నివేశాలు సినిమాకు బలంగా నిలిచాయి. ముఖ్యంగా చివరి వరకు ప్రేక్షకుడిని సీట్లో కూర్చోబెట్టేలా భావోద్వేగాలను పండించడంలో దర్శకుడు సక్సెస్‌ అయ్యారు.

రవితేజ ఎలా చేశారంటే..
మాస్‌ హీరోగా రవితేజను ఎన్నోసార్లు చూసిన ప్రేక్షకులకు.. ‘ఇరుముడి’లోని త్రినాథ్‌ పాత్ర కొంత కొత్త అనుభూతిని ఇస్తుంది. కథకు తగ్గట్టుగా సహజంగా నటించారు.

ముఖ్యంగా ద్వితీయార్ధంలో ఆయన నటన ఆకట్టుకుంటుంది. సాయికుమార్‌తో కలిసి వచ్చే ప్రీ క్లైమాక్స్‌, క్లైమాక్స్‌ సన్నివేశాల్లో రవితేజ తన అనుభవాన్ని చూపించారు.

తండ్రీకూతుళ్లే బలం..
కావేరి పాత్రలో ప్రియ భవానీ శంకర్‌ సహజంగా కనిపించారు. మణికంఠగా బేబీ నక్షత్ర తన నటనతో ఆకట్టుకుంది. రవితేజ, నక్షత్ర మధ్య వచ్చే సన్నివేశాలే సినిమాకు ప్రధాన బలంగా నిలిచాయి. సాయికుమార్‌, శ్వాసిక, అజయ్‌ ఘోష్‌, రమేశ్‌ తదితరులు తమ పాత్రలకు న్యాయం చేశారు.

సాంకేతికంగా..
జీవీ ప్రకాశ్‌కుమార్‌ సంగీతం సినిమాకు ప్లస్‌ పాయింట్‌. అయ్యప్ప మాల నేపథ్యంలోని పాటలు కథకు తగ్గట్టుగా సాగుతాయి. ముఖ్యంగా నేపథ్య సంగీతం కీలక సన్నివేశాల్లో భావోద్వేగాన్ని మరింత పెంచింది.

విష్ణు శర్మ సినిమాటోగ్రఫీ మరో ఆకర్షణ. సీలేరు ప్రాంతం అందాలను, థ్రిల్లింగ్‌ సన్నివేశాలను ఆయన కెమెరాలో బాగా చూపించారు. నిర్మాణ విలువలు కూడా ఉన్నతంగా ఉన్నాయి.

చివరగా..
కథకు సంబంధం లేని కమర్షియల్‌ హంగామాకు దూరంగా.. తండ్రీకూతుళ్ల బంధం, క్రైమ్‌ థ్రిల్‌, సామాజిక అంశాలను కలిపి ‘ఇరుముడి’ని తెరకెక్కించారు. అక్కడక్కడా తర్కానికి అందని సన్నివేశాలు ఉన్నప్పటికీ.. బలమైన రచన, భావోద్వేగాలు, రవితేజ నటన సినిమాను నిలబెట్టాయి.

ముఖ్యంగా ఆడపిల్లలను భయంతో కాకుండా ధైర్యంగా పెంచాలనే సందేశం సినిమాకు ప్రత్యేకతను తీసుకొచ్చింది. మొత్తంగా.. రవితేజను కొత్త తరహా పాత్రలో చూడాలనుకునే ప్రేక్షకులకు ‘ఇరుముడి’ ఓ మంచి ప్రయత్నంగా నిలుస్తుంది.