రేవంత్‌ అమెరికా టూర్‌కు బ్రేక్‌.. కేంద్రం క్లియరెన్స్‌ నిరాకరణ

తెలంగాణ సీఎం రేవంత్‌రెడ్డి అమెరికా పర్యటనకు బ్రేక్‌ పడింది. లండన్‌ పర్యటనలో ఉన్న ముఖ్యమంత్రి.. ముందుగా నిర్ణయించిన షెడ్యూల్‌ ప్రకారం ఈనెల 23న అమెరికా వెళ్లాల్సి ఉండగా.. కేంద్ర విదేశాంగశాఖ రాజకీయ అనుమతి ఇవ్వలేదు. దీంతో అమెరికా పర్యటనను రద్దు చేసుకుని.. లండన్‌ నుంచే హైదరాబాద్‌కు తిరిగి రావాలని నిర్ణయించారు. ఆగస్టు 23న ఆయన హైదరాబాద్‌ చేరుకోనున్నారు.

యూకేకు ఓకే.. అమెరికాకు నో
తెలంగాణ ప్రభుత్వం సీఎం యూకే, అమెరికా పర్యటనలకు కేంద్రం నుంచి అనుమతి కోరింది. అయితే విదేశాంగశాఖ యూకే పర్యటనకు మాత్రమే క్లియరెన్స్‌ ఇచ్చి.. అమెరికా పర్యటనకు అనుమతి నిరాకరించింది. అధికారిక ప్రతినిధి బృందం ఇప్పటికే లండన్‌ చేరుకున్న తర్వాత ఈ నిర్ణయం రాష్ట్ర ప్రభుత్వానికి తెలియజేసినట్లు సమాచారం. 

అమెరికా పర్యటనలో విద్య, సాంకేతిక రంగాల్లో అంతర్జాతీయ సంస్థలతో భాగస్వామ్యాలు, ఒప్పందాలు చేసుకోవాలని తెలంగాణ ప్రభుత్వం ప్రణాళిక రూపొందించింది. అయితే సీఎం పర్యటనకు క్లియరెన్స్‌ రాకపోవడంతో ఆయన స్వయంగా అమెరికా వెళ్లే కార్యక్రమం రద్దయింది.

అసలు కేంద్రం ఏం చెప్పింది?
అమెరికా పర్యటనకు అనుమతి ఎందుకు ఇవ్వలేదన్న దానిపై విదేశాంగశాఖ తాజాగా వివరణ ఇచ్చింది. సీఎం సహా ప్రముఖుల విదేశీ పర్యటనలకు రాజకీయ క్లియరెన్స్‌ ఇచ్చే ముందు ప్రతిపాదిత కార్యక్రమాన్ని పరిశీలిస్తామని MEA తెలిపింది. ఈ కేసులో ప్రతిపాదించిన కార్యక్రమం సీఎం పదవికి, పర్యటన ఉద్దేశానికి తగినట్లుగా లేదని పేర్కొంది. అయితే ఏ అంశం అభ్యంతరకరంగా ఉందన్న దానిపై మాత్రం పూర్తి వివరాలను వెల్లడించలేదు. 

రాజకీయ కోణంలోనే- రేవంత్‌రెడ్డి
కేంద్రం నిర్ణయంపై సీఎం రేవంత్‌రెడ్డి అసంతృప్తి వ్యక్తం చేశారు. తన అమెరికా పర్యటనకు రాజకీయ కోణంలో అనుమతి నిరాకరించడం దిగ్భ్రాంతికి గురిచేసిందన్నారు. ప్రపంచస్థాయి విద్యా సంస్థలను తెలంగాణకు తీసుకురావడమే తన పర్యటన ప్రధాన ఉద్దేశమని చెప్పారు. జాతీయ నిర్మాణం, యువత భవిష్యత్తు వంటి అంశాల్లో రాజకీయాలకు అతీతంగా ఆలోచించాల్సిన అవసరం ఉందని సీఎం వ్యాఖ్యానించారు. 

అధికారుల బృందం మాత్రం అమెరికాకు..
సీఎం అమెరికా పర్యటన రద్దయినా.. అధికారుల బృందం మాత్రం అక్కడి కార్యక్రమాలను కొనసాగించాలని రేవంత్‌రెడ్డి ఆదేశించారు. ప్రతిపాదిత ఎంవోయూలను పూర్తి చేయాలని, ప్రముఖ యూనివర్సిటీలతో భాగస్వామ్య ఒప్పందాలను ఖరారు చేసుకోవాలని సూచించారు. హార్వర్డ్‌, MIT సహా పలు విద్యాసంస్థలతో భాగస్వామ్యాలపై చర్చలు జరగాల్సి ఉంది. 

లండన్‌లో రేవంత్‌ బిజీ..
ప్రస్తుతం లండన్‌లో ఉన్న సీఎం రేవంత్‌రెడ్డి.. ఆక్స్‌ఫర్డ్‌ యూనివర్సిటీకి చెందిన బ్లావట్నిక్‌ స్కూల్‌ ఆఫ్‌ గవర్నెన్స్‌, కేంబ్రిడ్జ్‌ బృందం, లండన్‌ బిజినెస్‌ స్కూల్‌ తదితర సంస్థలతో సమావేశాలు నిర్వహించనున్నారు. అమెరికా పర్యటన రద్దయిన నేపథ్యంలో ఈ పర్యటనను ముగించుకుని ఆగస్టు 23న లండన్‌ నుంచి హైదరాబాద్‌కు తిరుగు ప్రయాణం కానున్నారు. 

మొత్తంగా.. తెలంగాణ సీఎం అమెరికా పర్యటనకు కేంద్రం క్లియరెన్స్‌ నిరాకరించడం ఇప్పుడు రాజకీయంగా హాట్‌టాపిక్‌గా మారింది. ఒకవైపు కేంద్రం “కార్యక్రమం తగినట్లుగా లేదు” అంటుంటే.. మరోవైపు సీఎం రేవంత్‌రెడ్డి మాత్రం రాజకీయ కోణంలోనే అనుమతి నిరాకరించారని చెబుతున్నారు.