రాజకీయాలపై రంగనాథ్ క్లారిటీ.. పవన్ భూమి వివాదంపైనా కీలక వ్యాఖ్యలు

హైడ్రా (HYDRA) కమిషనర్ ఏవీ రంగనాథ్ (A.V. Ranganath) తన రాజకీయ ప్రవేశంపై జరుగుతున్న ప్రచారానికి తెరదించారు. సోషల్ మీడియాలో వస్తున్న వార్తల్లో ఎలాంటి నిజం లేదని స్పష్టం చేసిన ఆయన.. తనను రాజకీయాలకు అనుసంధానం చేయకుండా, ప్రభుత్వ అధికారిగా తన బాధ్యతలను ప్రశాంతంగా నిర్వర్తించనివ్వాలని కోరారు.

గత కొంతకాలంగా తాను ఉద్యోగానికి రాజీనామా చేసి రాజకీయాల్లోకి వస్తున్నానని, జనసేన (Jana Sena) తరఫున తెలంగాణలో కీలక బాధ్యతలు చేపట్టబోతున్నాననే ప్రచారం జరుగుతోందని పేర్కొన్నారు. "సోషల్ మీడియానే నాకు పార్టీలు కేటాయించింది.. సీట్లు కూడా ఫిక్స్ చేసింది. కానీ నాకు రాజకీయాల్లోకి వచ్చే ఆలోచనే లేదు. నా బాధ్యత ప్రభుత్వ ఉద్యోగాన్ని సమర్థంగా నిర్వహించడమే" అని స్పష్టం చేశారు.

ఇదే సందర్భంగా జనసేన అధినేత పవన్ కల్యాణ్ (Pawan Kalyan)కు సంబంధించిన కోడి చెరువు (Kodi Cheruvu) భూ వివాదంపైనా రంగనాథ్ వివరణ ఇచ్చారు. పవన్ కల్యాణ్ చెరువును ఆక్రమించలేదని, చెరువు స్వరూపాన్ని ఎక్కడా మార్చలేదని తెలిపారు. అయితే చెరువు పరిధిలో ఫెన్సింగ్ (Fencing) ఏర్పాటు చేయడం మాత్రమే నిబంధనలకు విరుద్ధమని, ఆ అంశంపైనే హైడ్రా అభ్యంతరం వ్యక్తం చేసిందన్నారు.

చెరువుల పరిధిలో మూడు రకాల భూములు ఉంటాయని వివరించిన రంగనాథ్.. శిఖం ప్రభుత్వ భూమి (Shikam Government Land), శిఖం పట్టా (Shikam Patta), రెగ్యులర్ పట్టా (Regular Patta) భూముల మధ్య ఉన్న తేడాను కూడా వివరించారు. రెగ్యులర్ పట్టా భూములను కొనుగోలు చేయడం, విక్రయించడం చట్టబద్ధమేనని, పవన్ కల్యాణ్ కొనుగోలు చేసిన భూమి కూడా అదే కేటగిరీకి చెందినదని చెప్పారు.

రాజకీయ ప్రచారాలు, భూ వివాదాలపై వస్తున్న ఊహాగానాల నేపథ్యంలో హైడ్రా కమిషనర్ చేసిన ఈ వ్యాఖ్యలు ఇప్పుడు తెలంగాణ రాజకీయాల్లో చర్చనీయాంశంగా మారాయి.