సినీ లోకంలో విషాదం.. షావుకారు జానకి కన్నుమూత

తెలుగు సినీ పరిశ్రమలో మరో విషాదం చోటుచేసుకుంది. దక్షిణాది చిత్రసీమలో తనకంటూ ప్రత్యేక గుర్తింపు తెచ్చుకున్న ప్రముఖ సీనియర్‌ నటి షావుకారు జానకి కన్నుమూశారు. 94 ఏళ్ల వయసులో చెన్నైలోని కావేరి ఆస్పత్రిలో చికిత్స పొందుతూ తుదిశ్వాస విడిచారు. వయోభారంతో పాటు శ్వాసకోశ సంబంధిత అనారోగ్య సమస్యలతో బాధపడుతున్న ఆమె ఆరోగ్యం ఇటీవల క్షీణించడంతో ఆస్పత్రిలో చేర్పించారు. ఐసీయూలో చికిత్స పొందుతూ ఆమె మృతి చెందారు. 

‘షావుకారు’తో వచ్చిన గుర్తింపు
1931 డిసెంబర్‌ 12న రాజమండ్రిలో జన్మించిన జానకి అసలు పేరు శంకరమంచి జానకి. చిన్న వయసులోనే రేడియో, రంగస్థల కార్యక్రమాల్లో పాల్గొన్న ఆమె.. 1950లో వచ్చిన ‘షావుకారు’ చిత్రంతో వెండితెరకు పరిచయమయ్యారు. ఆ సినిమా విజయంతోనే ఆమె పేరు ‘షావుకారు జానకి’గా స్థిరపడింది. 

ఆ తర్వాత తెలుగు, తమిళ, కన్నడ, మలయాళ చిత్రాల్లో విభిన్న పాత్రలు పోషిస్తూ ప్రేక్షకుల మనసుల్లో చెరగని ముద్ర వేశారు. దాదాపు నాలుగు వందల చిత్రాల్లో నటించిన ఆమె.. ఏడు దశాబ్దాలకు పైగా సాగిన సుదీర్ఘ సినీ ప్రయాణంలో ఎన్నో విలక్షణ పాత్రలు పోషించారు. 

ఎన్నో అద్భుత పాత్రలు..
‘రోజులు మారాయి’, ‘కన్యాశుల్కం’, ‘జయం మనదే’, ‘డాక్టర్‌ చక్రవర్తి’, ‘పాండురంగ మహత్యం’, ‘సంసారం ఒక చదరంగం’ తదితర చిత్రాల్లో ఆమె నటనకు మంచి గుర్తింపు వచ్చింది. తమిళంలోనూ కె. బాలచందర్‌ వంటి ప్రముఖ దర్శకులతో కలిసి ఎన్నో గుర్తుండిపోయే పాత్రలు చేశారు. 

నటనతో పాటు రంగస్థలంపై కూడా ఆమె తన ప్రతిభను చాటుకున్నారు. పలు తరాల నటీనటులతో కలిసి పనిచేసిన జానకి.. దక్షిణాది సినిమా చరిత్రలో తనకంటూ ప్రత్యేక స్థానాన్ని సంపాదించుకున్నారు.

పద్మశ్రీతో గౌరవం
సినీ రంగానికి ఆమె చేసిన విశిష్ట సేవలకు గుర్తింపుగా కేంద్ర ప్రభుత్వం 2022లో పద్మశ్రీ పురస్కారంతో సత్కరించింది. తమిళనాడు ప్రభుత్వం నుంచి కళైమామణి, ఆంధ్రప్రదేశ్‌ నుంచి నంది పురస్కారాలతో పాటు పలు జీవిత సాఫల్య పురస్కారాలు ఆమెను వరించాయి. 

చివరి సినిమా
తొలితరం నుంచి ఇప్పటి తరం వరకు సినిమాల్లో కొనసాగిన షావుకారు జానకి.. ‘అన్నీ మంచి శకునములే’ చిత్రంలో చివరిసారిగా తెలుగు ప్రేక్షకులకు కనిపించారు. 2023లో విడుదలైన ఈ సినిమాలో ఆమె నటించారు. షావుకారు జానకి మృతితో తెలుగు, తమిళ సినీ పరిశ్రమల్లో విషాదం నెలకొంది. ఆమెతో కలిసి పనిచేసిన పలువురు సినీ ప్రముఖులు, అభిమానులు దిగ్భ్రాంతి వ్యక్తం చేస్తూ నివాళులర్పిస్తున్నారు.