నాకు 15 ఏళ్లే.. నన్ను క్షమించండి" ప్రధాని మోదీకి బాలిక క్షమాపణ.. వీడియో వైరల్
newspillar
ప్రధాని మోదీకి బాలిక క్షమాపణ.. వీడియో వైరల్
ప్రధాని నరేంద్ర మోదీపై నిరసన కార్యక్రమంలో చేసిన వ్యాఖ్యలపై ఓ బాలిక క్షమాపణ కోరిన వీడియో సామాజిక మాధ్యమాల్లో వైరల్గా మారింది. "నాకు 15 ఏళ్లే. నేను చేసిన తప్పును గుర్తించాను. మోదీజీ నన్ను క్షమించండి" అంటూ ఆమె వీడియోలో విజ్ఞప్తి చేసింది.
ఇటీవల పేపర్ లీక్ వ్యవహారానికి వ్యతిరేకంగా నిర్వహించిన నిరసనల్లో పాల్గొన్న సమయంలో ప్రధాని మోదీపై అభ్యంతరకర వ్యాఖ్యలు చేసినందుకు ఆమెపై కేసు నమోదైంది. ఈ నేపథ్యంలో విడుదల చేసిన వీడియోలో తన వ్యాఖ్యలపై పశ్చాత్తాపం వ్యక్తం చేసింది.
"నిరసనల్లో పాల్గొన్న సమయంలో కొందరి ప్రభావానికి లోనై అలా మాట్లాడాను. నేను చేసిన పని తప్పేనని ఇప్పుడు అర్థమైంది. ఇలాంటి వ్యాఖ్యలు మళ్లీ చేయను. నా మాటలకు నేను సిగ్గుపడుతున్నాను. ప్రధాని గారికి, దేశ ప్రజలకు క్షమాపణలు చెబుతున్నాను" అని బాలిక పేర్కొంది.
బాలికపై కేసు నమోదు
బాలికపై నోయిడా పోలీస్ స్టేషన్లో జీరో ఎఫ్ఐఆర్ నమోదు చేసి, తదుపరి విచారణ కోసం ఢిల్లీలోని పార్లమెంట్ స్ట్రీట్ పోలీస్ స్టేషన్కు బదిలీ చేశారు. ప్రధాని పదవిని అవమానించేలా, శాంతిభద్రతలకు విఘాతం కలిగించేలా వ్యాఖ్యలు చేశారన్న ఫిర్యాదు మేరకు కేసు నమోదు చేసినట్లు పోలీసులు తెలిపారు. ఫిర్యాదులో ఆమె వయసు 25 ఏళ్లుగా ప్రస్తావించగా, వీడియోలో మాత్రం తన వయసు 15 ఏళ్లని బాలిక వెల్లడించింది.
మోదీ స్పందన.. "వాళ్లు మన పిల్లలే"
ఇదిలా ఉండగా, జంతర్మంతర్లో నిరసన సందర్భంగా తనను విమర్శించిన విద్యార్థులపై ప్రధాని మోదీ స్పందించారు. "యవ్వనంలో ఇలాంటి తప్పిదాలు జరుగుతుంటాయి. వాళ్లు మన పిల్లలే. నేను వారిని క్షమిస్తున్నాను" అంటూ ఆయన సోషల్ మీడియాలో సందేశం పోస్టు చేశారు.
తల్లి క్షమాపణ
బాలిక తల్లి కూడా జరిగిన ఘటనపై విచారం వ్యక్తం చేశారు. "జరిగిన విషయంపై ఇప్పటికే పోలీసులకు క్షమాపణ లేఖ అందజేశాం. ఈ ఘటన పట్ల మేము తీవ్ర విచారం వ్యక్తం చేస్తున్నాం" అని ఆమె మీడియాకు తెలిపారు.
