ఆకాశ విహారం.. అంతలోనే అంతిమయాత్ర
newspillar
పెరూలో పర్యాటకుల విమానం కుప్పకూలి 13 మంది దుర్మరణం
నాజ్కా లైన్స్ వీక్షించేందుకు వెళ్లిన విదేశీ పర్యాటకుల ప్రయాణం అర్ధాంతరంగా ముగింపు
లిమా (పెరూ)- ప్రపంచ ప్రఖ్యాత నాజ్కా లైన్స్ను ఆకాశం నుంచి వీక్షించాలన్న ఆశతో బయలుదేరిన పర్యాటకుల ప్రయాణం ఘోర విషాదంగా ముగిసింది. పెరూలోని నాజ్కా నగర సమీపంలో పర్యాటకులను తీసుకెళ్తున్న చిన్న విమానం కుప్పకూలడంతో అందులో ఉన్న 13 మంది మృతి చెందారు.
అధికారుల వివరాల ప్రకారం.. ప్రమాదంలో జర్మనీకి చెందిన ఇద్దరు, స్పెయిన్కు చెందిన ఇద్దరు, ఇటలీకి చెందిన ఏడుగురు పర్యాటకులతో పాటు ఇద్దరు విమాన సిబ్బంది ప్రాణాలు కోల్పోయారు. వీరంతా సమీపంలోని ఇకా నగరం నుంచి నాజ్కా లైన్స్ను గాల్లో నుంచి వీక్షించేందుకు ప్రత్యేక పర్యాటక విమానంలో ప్రయాణం ప్రారంభించారు.
అయితే టేకాఫ్ అయిన కొద్ది సేపటికే విమానం అదుపుతప్పి ఓ వ్యవసాయ పొలంలో కుప్పకూలింది. ప్రమాద తీవ్రత ఎక్కువగా ఉండటంతో విమానంలోని వారంతా అక్కడికక్కడే మృతి చెందినట్లు అధికారులు తెలిపారు.
ప్రపంచ వారసత్వ సంపదగా నాజ్కా లైన్స్
పెరూ ఎడారి ప్రాంతంలో వేల ఏళ్ల క్రితం చెక్కబడిన నాజ్కా లైన్స్ ప్రపంచ ప్రసిద్ధ పురావస్తు కట్టడాల్లో ఒకటి. పక్షులు, జంతువులు, జ్యామితీయ ఆకారాలతో రూపొందిన ఈ భారీ భూచిత్రాలు భూమిపై నుంచి పూర్తిగా కనిపించవు. అందుకే ప్రపంచం నలుమూలల నుంచి వచ్చే పర్యాటకులు ప్రత్యేక విమానాల్లో ప్రయాణించి వాటిని ఆకాశం నుంచి వీక్షిస్తుంటారు.
దర్యాప్తు ప్రారంభం
విమానం కూలడానికి గల కారణాలు ఇంకా తెలియరాలేదు. సాంకేతిక లోపమా, ప్రతికూల వాతావరణమా, లేక మరేదైనా కారణమా అనే కోణంలో పెరూ విమానయాన అధికారులు దర్యాప్తు ప్రారంభించారు. ప్రమాద స్థలంలో సహాయక బృందాలు, దర్యాప్తు అధికారులు ఆధారాలు సేకరిస్తున్నారు.
